کانگریس کے سینئر رہنما اور سابق مرکزی وزیر قانون ویرپا موئیلی نے دعویٰ کیا ہے کہ یو پی اے حکومت کے دوران کانگریس کے کچھ رہنماؤں نے نریندر مودی کے خلاف جاری جانچ کو رکوا دیا تھا۔ میڈیا رپورٹس کے مطابق، موئیلی کا کہنا تھا کہ یو پی اے کے دور میں متعدد رہنماؤں کی مداخلت کے باعث نریندر مودی سلاخوں کے پیچھے جانے سے بچ گئے تھے۔

ویرپا موئیلی کے مطابق، اس وقت امت شاہ کی گرفتاری کے بعد نریندر مودی کی بھی گرفتاری کی صورت حال بن سکتی تھی۔ موئیلی نے اس اقدام کو کانگریس کی ایک بہت بڑی سیاسی بھول قرار دیا اور کہا کہ پارٹی آج اس کا خمیازہ بھگت رہی ہے۔

رہنماؤں کے نام اور مقدمے کا ذکر نہیں

کرناٹک کے سابق وزیر اعلیٰ ویرپا موئیلی نے یہ بھی واضح کیا کہ جانچ روکنے کا یہ فیصلہ اس وقت کے وزیر اعظم منموہن سنگھ کا نہیں تھا، بلکہ یہ فیصلہ دیگر رہنماؤں نے لیا تھا۔ انہوں نے بتایا کہ یہ سارا واقعہ اس وقت پیش آیا تھا جب وہ خود مرکزی وزیر قانون کے عہدے پر فائز تھے۔

تاہم، موئیلی نے اپنے بیان میں یہ واضح نہیں کیا کہ کس مخصوص مقدمے میں نریندر مودی کے خلاف جانچ روکی گئی تھی۔ اس کے ساتھ ہی انہوں نے کانگریس یا یو پی اے کے ان رہنماؤں کے نام بھی ظاہر نہیں کیے جنہوں نے اس تفتیشی عمل میں مداخلت کر کے اسے رکوایا تھا۔