کانپور:اتر پردیش کے کانپور میں جوتوں کی فیکٹری میں زبردست آگ لگ گئی۔ پی ٹی آئی کے مطابق اس حادثے میں ایک ہی کنبہ کے پانچ افراد زندہ جل گئے۔ بتادیں کہ رات گئے جوتوں کی فیکٹری میں زبردست آگ بھڑک اٹھی۔ حادثے کے وقت عمارت کی چوتھی منزل پر ایک خاندان پھنسا ہوا تھا۔
قابل ذکر ہے کہ یہ واقعہ کانپور کے چمن گنج تھانہ علاقے میں واقع پریم نگر میں پیش آیا۔ اتوار کی رات یہاں ایک چار منزلہ عمارت میں زبردست آگ لگ گئی۔ آگ نے خوفناک شکل اختیار کر لی کیونکہ عمارت کی دوسری منزل پر جوتوں کی فیکٹری تھی۔ واقعہ کی اطلاع ملتے ہی فائر بریگیڈ کی چار گاڑیاں موقع پر پہنچ گئیں اور آگ بجھانے کی کوشش شروع کردی۔
فائر فائٹرز نے آگ میں لپٹی عمارت سے کچھ لوگوں کو بچایا لیکن وہ سب آگ میں پھنس جانے کی وجہ سے بری طرح جھلس گئے۔ یہی نہیں ریسکیو آپریشن کے بعد سب کو اسپتال بھیجا گیا لیکن کسی کو بچایا نہیں جاسکا۔
مقامی لوگوں کا کہنا ہے کہ آگ پہلے تہہ خانے سے شروع ہوئی اور پھر تیزی سے پھیل کر صرف 20 منٹ میں عمارت کی بالائی منزلوں تک پہنچ گئی۔ فائر بریگیڈ کی ٹیمیں آگ پر قابو پانے کی پوری کوشش کر رہی ہیں۔ تاہم ابھی تک یہ معلوم نہیں ہو سکا کہ عمارت میں آگ کس وجہ سے لگی۔ تاہم لوگوں کا کہنا ہے کہ یہ آگ شارٹ سرکٹ کی وجہ سے لگی۔
