نئی دہلی: جنوبی دہلی میں ہفتہ کی شام ساکیت میٹرو اسٹیشن کے قریب ایک تین منزلہ عمارت منہدم ہوگئی۔ حادثے میں میڈیکل کے دو طالب علموں کی موت ہو گئی۔ ملبہ کی ایک بڑی مقدار باقی ہے، اور اسے ہٹانے کی کوششیں جاری ہیں۔ این ڈی آر ایف اور مقامی انتظامیہ ریسکیو آپریشن کر رہی ہے۔ پوری عمارت ملبے کے ڈھیر میں تبدیل ہو گئی۔ پولیس نے بتایا کہ اب تک نو افراد کو بچا لیا گیا ہے جبکہ متعدد ایجنسیاں ملبے تلے دبے افراد کی تلاش کر رہی ہیں۔
فارن میڈیکل گریجویٹس (ایف ایم جی) کے صدر ڈاکٹر جسونت نے کہا، “اب تک نو سے دس لوگوں کو بچا لیا گیا ہے۔ ان میں سے ہمارے میڈیکل ڈاکٹر، جو ایف ایم جی یا پی جی کی تیاری کر رہے تھے، یہاں میس میں تھے۔ اب تک ان میں سے دو کی موت ہو چکی ہے، اور باقی دو کوڈسچارج کر دیا گیا ہے۔”
ان کا مزید کہنا تھا کہ کسی کو اندر جانے کی اجازت نہیں ہے۔ سب کے والدین پریشان ہیں۔ اگر سینٹر میں کرین نہیں ہے، اگر سینٹرمیں سہولیات نہیں ہیں تو باقی لوگوں کا کیا ہوگا؟… موجودہ حالات بہت خراب ہیں، اور بہت افراتفری ہے…”
ساکیت میٹرو اسٹیشن کے قریب سعیدالعجائب کے علاقے میں مغربی مارگ پر واقع اس عمارت میں ایک کوچنگ انسٹی ٹیوٹ، کیفے اور دفاتر موجود تھے اور تیسری منزل پر تعمیراتی کام جاری تھا۔ دہلی فائر سروس (ڈی ایف ایس) کے مطابق، مقامی اور پی سی آر کے اہلکاروں نے فائر فائٹرز کے پہنچنے سے پہلے تین لوگوں کو بچایا، جب کہ دیگر کو نیشنل ڈیزاسٹر رسپانس فورس (این ڈی آر ایف) کی مدد سے فائر فائٹرز نے بچایا۔
فائر حکام نے بتایا کہ تین منزلہ عمارت مکمل طور پر منہدم ہوگئی اور اس کے ساتھ والی ایک عارضی ٹین کی چھت والی کینٹین پر گر گئی، جہاں طلباء کھانا کھا رہے تھے۔ زخمی طالب علموں میں سے ایک کے والد بلونت یادو نے بتایا کہ ان کی 25 سالہ بیٹی نیلم عمارت کے ساتھ والی کینٹین میں تھی جب یہ گری۔
نیلم حال ہی میں اپنا ایم بی بی ایس مکمل کرنے کے بعد بیرون ملک سے واپس آئی تھی اور ساکیت میں ایرائز میڈیکل اکیڈمی میں پوسٹ گریجویٹ داخلہ امتحان کی تیاری کر رہی تھی۔ بلونت نے کہا، “واقعہ کے وقت کینٹین میں تقریباً 30 سے 35 طالب علم موجود تھے۔ ان میں سے زیادہ تر طالب علم تھے جو انسٹی ٹیوٹ میں میڈیکل کے مختلف امتحانات کی تیاری کر رہے تھے۔ میری بیٹی کی ٹانگ ٹوٹ گئی ہے اور اس کا علاج چل رہا ہے۔”
مقامی رہائشی رویندر سنگھ نے کہا، “یہ عمارت غالباً چار یا پانچ سال پہلے بنائی گئی تھی۔” جائے وقوعہ پر موجود ڈسٹرکٹ مجسٹریٹ کے دفتر کے ایک اہلکار دھرم ویر سنگھ نے بتایا کہ امدادی کارکن اب بھی ملبے میں پھنسے لوگوں تک پہنچنے کی کوشش کر رہے ہیں۔ انہوں نے مزید کہا، “تقریباً چھ سے سات لوگوں کے اب بھی منہدم عمارت کے نیچے پھنسے ہونے کا خدشہ ہے۔ ان کے چہرے باہر سے دکھائی دے رہے ہیں، اور این ڈی آر ایف کے اہلکار انہیں بچانے کے لیے کام کر رہے ہیں۔”
