دہرادون: ایک تاریخی قدم اٹھاتے ہوئے، اتراکھنڈ اسمبلی نے بدھ کو یونیفارم سول کوڈ بل کو منظور کر لیا۔ اتراکھنڈ ایسا کرنے والی آزاد ہندوستان کی پہلی ریاست بن گئی ہے۔ اس بل کو وزیر اعلیٰ پشکر سنگھ دھامی نے پیش کیا تھا جس کا مقصد تمام شہریوں کے لیے یکساں شادی، طلاق، زمین، جائیداد اور وراثت کے قوانین کو ان کے مذہب سے قطع نظر قائم کرنا تھا۔
اس سے قبل اسمبلی میں بل کے حوالے سے زبردست بحث ہوئی اور بدھ کو بھی اس پر بحث جاری رہی۔ اپوزیشن جماعتوں کے ارکان نے سب سے پہلے اس بل کو ایوان کی سلیکٹ کمیٹی کو بھیجنے کا مطالبہ کیا۔ تاہم اس کے بعد یہ بل اسمبلی میں صوتی ووٹ سے منظور کر لیا گیا۔ اس طرح اتراکھنڈ نے تاریخ رقم کی ہے۔ دھامی حکومت نے یو سی سی پر قانون پاس کرنے کے لیے اسمبلی کا خصوصی اجلاس بلایا تھا۔
یوسی سی شادی، طلاق، وراثت، گود لینے اور دیگر معاملات سے متعلق تمام مذہبی کمیونٹیز کے لیے مشترکہ قوانین پر مشتمل ہے۔ اس مسودے کی تیاری کے لیے پانچ رکنی کمیٹی تشکیل دی گئی تھی۔ ریٹائرڈ جسٹس رنجنا پرکاش دیسائی کی قیادت میں پانچ رکنی کمیٹی نے گزشتہ جمعہ کو وزیراعلیٰ پشکر سنگھ دھامی کو اپنی رپورٹ پیش کی تھی۔
اس رپورٹ کی بنیاد پر اسمبلی سے پاس ہونے کے بعد یہ قانون بن گیا ہے۔ سی ایم دھامی نے اسمبلی میں کہا کہ یہ کوئی عام بل نہیں ہے بلکہ ہندوستان کے اتحاد کا فارمولا ہے۔ جس تصور کے ساتھ ہمارے آئین کے معماروں نے ہمارا آئین بنایا تھا اسے دیو بھومی اتراکھنڈ سے زمین پر لاگو کیا جائے گا۔
انہوں نے اسے تاریخی بل قرار دیا۔ انہوں نے کہا کہ یہ دراصل دیو بھومی اتراکھنڈ کی خوش قسمتی ہے کہ اسے یہ موقع ملا ہے۔ ہندوستان میں کئی بڑی ریاستیں ہیں لیکن اتراکھنڈ کو یہ موقع ملا ہے۔ ہم سب کو فخر ہے کہ ہمیں تاریخ لکھنے کا موقع ملا ہے۔
