واشنگٹن:ایران پر اسرائیلی حملے کے محدود اثرات کی تصدیق کرنے کے لیے امریکی صدر بائیڈن کا بیان بھی آگیا۔ ہفتے کے روز امریکی صدر جو بائیڈن نے کہا کہ ایسا لگتا ہے کہ ایران پر اسرائیلی حملے میں صرف فوجی اہداف کو نشانہ بنایا گیا ہے۔ مجھے امید ہے کہ یہ حملے اسرائیل اور ایران کے درمیان مہینوں سے جاری باہمی کشیدگی کو اختتام پذیر کرنے والے ہوں گے۔
یہ بیان اس وقت سامنے آیا جب ایرانی وزیر خارجہ عباس عراقچی نے ہفتے کے روز اعلان کیا ہے کہ ان کے ملک کے اپنے دفاع کے عزم کی کوئی حد نہیں ہے۔ اس سے قبل اسرائیل کی طرف سے ایرانی فوجی مقامات پر حملے کیے گئے۔ عباس عراقچی نے ایرانی سپریم لیڈر کی ویب سائٹ کو انٹرویو دیتے ہوئے کہا کہ میرے خیال میں ہم نے ثابت کر دیا ہے کہ اپنے دفاع کے لیے ہمارے عزم کی کوئی حد نہیں ہے۔
تین باخبر ذرائع نے اطلاع دی ہے کہ اسرائیل نے کل جمعہ کو تہران کو ثالثوں کے ذریعے ایک پیغام بھیجا، جس میں اس نے حملے کی نوعیت کے حوالے سے اشارہ دے دیا تھا۔ اس پیغام میں اسرائیل نے ایرانیوں کو جواب دینے سے خبردار کیا۔
ایک باخبر ذریعے کے مطابق اسرائیلیوں نے ایرانیوں پر پہلے ہی واضح کر دیا تھا کہ وہ عام طور پر کس قسم کا حملہ کریں گے اور کس چیز پر حملہ نہیں کریں گے۔ ان ذرائع نے مزید کہا کہ اسرائیلی پیغام تین فریقوں کے ذریعے پہنچایا گیا تھا۔ یہ دونوں ممالک کے درمیان حملوں کے جاری تبادلے کو محدود کرنے کی کوشش اور وسیع پیمانے پر کشیدگی کو روکنے کی ایک کوشش تھی۔
اس معلومات کا انکشاف امریکی اور اسرائیلی حکام کی جانب سے اس وضاحت کے بعد سامنے آیا ہے کہ صبح کے وقت فضائی حملوں کو تین مراحل میں پورا کیا گیا۔ حملوں کی پہلی لہر ایرانی فضائی دفاعی نظام پر مرکوز تھی۔ دوسری اور تیسری لہر نے میزائل اور ڈرون اڈوں اور ہتھیاروں کی تیاری کے مقامات کو نشانہ بنایا۔
تہران نے تصدیق کی ہے کہ اس نے اسرائیلی حملے کو ناکام بنا دیا ہے۔ تاہم ان حملوں سے کچھ مقامات پر صرف محدود نقصان ہوا۔ حملوں نے تہران، ایلام اور اہواز کے صوبوں کو متاثر کیا۔
وائٹ ہاؤس نے ایران سے مطالبہ کیا ہے کہ وہ جوابی کارروائی نہ کرے اور خطے میں کشیدگی میں اضافے سے گریز کرے تاکہ خطہ تشدد اور باہمی ردعمل کے چکر میں نہ دھنس جائے۔ اسرائیل نے تصدیق کی ہے کہ ایران پر اس کا فضائی حملہ ختم ہو گیا ہے۔ باخبر ذرائع نے اسے جواب دینے کے خلاف خبردار کیا ہے۔
