نئی دیلی :وزیر خزانہ نرملا سیتا رمن 23 جولائی 2024 کو اپنا لگاتار ساتواں بجٹ پیش کریں گی۔ یکم فروری 2024 کے بعد اس سال آنے والا یہ دوسرا بجٹ ہے۔ لوک سبھا انتخابات سے پہلے وزیر خزانہ نے عبوری بجٹ پیش کیا تھا۔ اور اب یہ نریندر مودی کی قیادت والی این ڈی اے حکومت کا 11 واں بجٹ ہوگا جو مسلسل تیسری بار اقتدار میں آئی ہے۔ متوسط طبقے، ٹیکس دہندگان، کسانوں، خواتین، تاجروں اور تنخواہ دار طبقے کو مودی حکومت 3.0 کے اس پہلے مرکزی بجٹ 2024 سے بہت امیدیں ہیں۔ نرملا تائی ایک بار پھر 11 بجے پارلیمنٹ کے ایوان زیریں لوک سبھا میں اپنے مانوس انداز میں بجٹ پیش کریں گی۔
مالیاتی خسارہ: اس سال فروری میں پیش کیے گئے عبوری بجٹ کے مطابق، مالیاتی خسارہ، حکومت کے اخراجات اور آمدنی میں فرق، موجودہ مالی سال میں 5.1 فیصد رہنے کا تخمینہ ہے۔ یہ تعداد گزشتہ مالی سال میں 5.8 فیصد تھی۔ ٹیکس وصولیوں میں اضافے کی وجہ سے مکمل بجٹ میں پہلے کے مقابلے بہتر تخمینہ متوقع ہے۔ حکومت نے مالی سال 2025-26 میں مالیاتی خسارہ جی ڈی پی کا 4.5 فیصد رہنے کا تخمینہ لگایا ہے۔
ا سکاٹ لینڈ کے ماہر اقتصادیات جیمز ولسن نے پہلاہندوستانی بجٹ 163 سال قبل 1860 میں پیش کیا تھا۔ آزادی کے بعد اس وقت کے وزیر خزانہ آر کے شانمکھم چیٹی نے پہلا بجٹ 26 نومبر 1947 کو پیش کیا۔
بجٹ 2024 میں زرعی شعبے سے متعلق بڑے اعلانات کیے جا سکتے ہیں۔ زرعی شعبے کا بجٹ بھی مودی حکومت بڑھا سکتی ہے تاکہ ترقی نظر آئے۔
سیتا رمن اپنے ساتویں بجٹ میں مینوفیکچرنگ کی نئی سہولیات کے لیے ٹیکس مراعات دے سکتی ہیں اور روزگار پیدا کرنے کے لیے مختلف شعبوں میں مقامی خریداری کی حوصلہ افزائی کر سکتی ہیں۔ متوسط طبقے کو سب سے زیادہ انتظار ہوگا کہ آیا سیتا رمن متوسط طبقے کے لیے ٹیکس میں ریلیف کا اعلان کریں گی یا نہیں۔ متوسط طبقے کو قبل از انتخابات عبوری بجٹ میں کچھ نہیں ملا، اس لیے ان کی توقعات بہت زیادہ ہو گئی ہیں۔
