نئی دہلی : کمیونسٹ پارٹی آف انڈیا (سی پی آئی) کے قومی سکریٹری اتل کمار انجان انتقال کر گئے۔ اتل کمار انجان (69) گزشتہ ایک ماہ سے گومتی نگر کے ایک اسپتال میں ایڈوانس اسٹیج کینسر سے لڑ رہے تھے۔ 1977 میں لکھنؤ یونیورسٹی اسٹوڈنٹس یونین کے صدر کے طور پر سیاست شروع کرنے والے اتل انجان کو سماجی انصاف اور بائیں بازو کی سیاست کا ایک بڑا چہرہ سمجھا جاتا تھا۔
کسانوں اور محنت کشوں کے مفادات کے تئیں سی پی آئی لیڈر کی ثابت قدمی نے زندگی کے تمام شعبوں سے تعلق رکھنے والے لوگوں کی طرف سے بھرپور تعریف اور احترام حاصل کیا ہے۔ جوشیلےطلبا رہنما، جو کبھی اپنی تقریری صلاحیتوں کے لیے مشہور تھے، سیاست میں ایک الگ مقام حاصل کر چکے تھے۔
