پٹنہ:بہار میں کانگریس لیڈر راہل گاندھی اور تیجسوی یادو کی ووٹر ادھیکار یاترا کا آج آخری دن ہے۔ اختتامی ریلی میں راہل گاندھی نے بڑا اعلان کیا ہے۔ راہل گاندھی ووٹ چوری کے معاملے پر مسلسل بی جے پی کو گھیر رہے ہیں۔ اس دوران انہوں نے اب کہا ہے کہ ہم نے مہادیو پورہ میں ایٹم بم گرایا اور اب ہائیڈروجن بم آنے والا ہے۔ مودی جی ملک کو منہ نہیں دکھا سکیں گے۔
یہ یاترا 17 اگست کو بہار میں ایس آئی آر (ووٹر لسٹ پر نظر ثانی) اور ووٹ چوری کے خلاف شروع کی گئی تھی۔ یہ یاترا ساسارام سے شروع ہوئی تھی۔ یاترا نے بہار کے تقریباً 25 اضلاع سے ہوتے ہوئے 1300 کلومیٹر کا فاصلہ طے کیا اور اب یہ پٹنہ میں ختم ہو رہی ہے۔ اس یاترا سے کئی اپوزیشن لیڈر جڑے ہوئے ہیں۔
راہل گاندھی نے یاترا کے اختتام پر کہا کہ یہ یاترا بہار سے شروع ہوئی اور ہم نے اسے ووٹر ادھیکار یاترا کا نام دیا۔ شیوسینا کے لیڈران یہاں موجود ہیں۔ مہاراشٹر میں این سی پی، کانگریس اور شیو سینا سے ووٹ چرائے گئے۔ لوک سبھا انتخابات کے بعد ووٹر لسٹ میں تقریباً 1 کروڑ نئے ووٹر شامل ہوئے ہیں۔ نئے ووٹر آتے ہیں اور ووٹ دیتے ہیں۔ لوک سبھا میں ہمارے اتحاد کو جتنے بھی ووٹ ملے، ودھان سبھا میں بھی وہی ملے۔ تمام نئے ووٹ بی جے پی کے کھاتے میں گئے۔ ہم لوک سبھا جیت گئے لیکن ہماری تین مضبوط پارٹیوں کا ودھان سبھا میں صفایا ہو گیا۔
راہل گاندھی نے مزید کہا، کیونکہ الیکشن کمیشن اور بی جے پی نے مل کر ووٹ چوری کئے۔ اس کے بعد ہم نے صاف ظاہر کیا کہ مہادیو پورہ کے ایک علاقے میں 1 لاکھ سے زیادہ فرضی ووٹر تھے۔ الیکشن کمیشن ہمیں ووٹر لسٹ اور ویڈیو گرافی نہیں دیتا۔
راہل گاندھی نے بتایا کہ ووٹ چوری کا مطلب کیا ہے۔ انہوں نے کہا، ووٹ چوری کا مطلب ہے حقوق کی چوری، ووٹ کی چوری کا مطلب ریزرویشن کی چوری، ووٹ کی چوری کا مطلب روزگار کی چوری، ووٹ کی چوری کا مطلب تعلیم کی چوری، ووٹ کی چوری کا مطلب جمہوریت کی چوری، ووٹ کی چوری کا مطلب نوجوانوں کے مستقبل کی چوری ہے۔ وہ صرف ووٹ نہیں لے رہے ہیں، وہ آپ کی زمین، آپ کا راشن کارڈ، سب کچھ چھین لیں گے۔ وہ اسے اڈانی اور امبانی کو دیں گے۔
راہل گاندھی نے مزید کہا، وہی طاقتیں جنہوں نے مہاتما گاندھی کو مارا، اس آئین کو مارنے کی کوشش کر رہی ہیں۔ ہم انہیں آئین کا قتل نہیں کرنے دیں گے۔ اسی لیے ہم نے بہار میں یاترا نکالی۔ اس یاترا میں بہار کے تمام نوجوان کھڑے تھے۔ بیچ میں بی جے پی والے کالے جھنڈے دکھا رہے ہیں۔
راہل گاندھی نے کہا، اب بی جے پی کو اس اہم بات کو سننا چاہئے۔ بی جے پی کے بارے میں بات کرتے ہوئے انہوں نے کہا کہ آپ نے ایٹم بم کا نام سنا ہوگا، ہائیڈروجن بم اس سے بڑا ہے۔ ہم نے مہادیو پورہ میں ایٹم بم گرایا۔ بی جے پی والوں، تیار ہو جاؤ، ہائیڈروجن بم آنے والا ہے۔ ووٹ چوری کی حقیقت پورے ملک کو معلوم ہونے والی ہے۔ ہائیڈروجن بم کے بعد مودی جی اس ملک کو منہ نہیں دکھا سکیں گے۔
