سیتا پور: تقریباً پانچ ماہ کے بعد، روزنامہ جاگرن کے مہولی صحافی راگھویندر باجپئی کے قتل کے دو ملزمین کو جمعرات کی صبح پولیس اور ایس ٹی ایف کی مشترکہ ٹیم نے انکاؤنٹر میں مار دیا ۔
گولیوں سے زخمی مجرموں کو سی ایچ سی پساواں لایا گیا، جہاں سے انہیں ڈسٹرکٹ اسپتال ریفر کر دیا گیا۔ انہیں وہاں مردہ قرار دے دیا گیا۔ مہولی کے صحافی راگھویندر باجپئی کو 8 مارچ کو سیتا پور بریلی ہائی وے پر ہیم پور ریلوے اوور برج پر گولی مار کر ہلاک کر دیا گیا تھا۔ راگھویندر کو چار گولیاں ماری گئیں۔
پولیس سپرنٹنڈنٹ انکور اگروال نے بتایا کہ مخبر کی اطلاع پر پولیس اور ایس ٹی ایف کی پانچ ٹیمیں پساواں تھانہ علاقے میں چیکنگ کر رہی تھیں۔ بائک پر سوار دو نوجوان مہولی پساواں روڈ پر دلہ پور چوراہے کے قریب سے گزرے۔ پولیس نے انہیں روکنے کی کوشش کی۔
اس پر موٹر سائیکل سواروں نے پولیس پر فائرنگ شروع کر دی۔ جوابی فائرنگ میں جوانوں کو گولیاں لگیں۔ ان کی شناخت سنجے تیواری عرف عقیل اور راجو تیواری عرف رضوان کے طور پر ہوئی ہے۔ پولیس سپرنٹنڈنٹ انکور اگروال نے بتایا کہ ملزمان کو علاج کے لیے ضلع اسپتال بھیجا گیا، جہاں ان کی موت ہوگئی۔
ایس پی نے کہا کہ دونوں صحافی راگھویندر باجپئی قتل کیس میں ملوث تھے۔ ان دونوں پر ایک ایک لاکھ کا اعلان پہلے ہی کیا گیا تھا۔ دونوں کے پاس سے ایک کاربائن اور ایک پستول برآمد ہوا ہے۔
