پوری: اڈیشہ کے پوری میں سری گنڈیچا مندر کے رتھ کے سامنے بھگدڑ مچ گئی۔ بھگوان جگناتھ کے رتھ کو چھونے کے لیے یہاں عقیدت مندوں کی ایک بڑی بھیڑ جمع تھی۔ اس دوران بھگدڑ مچ گئی، جس میں کئی لوگ زخمی ہوگئے۔ بھگدڑ کا واقعہ اتوار کی صبح 4 سے 5 بجے کے درمیان پیش آیا۔ موقع پر کوئی ایمبولینس موجود نہیں تھی۔ ایسے میں لوگ خود زخمیوں کو اٹھا کر ہسپتال لے گئے۔ تاہم اب وہاں حالات معمول پر آ رہے ہیں
جب رتھ اپنی منزل پر پہنچے تو انہیں گنڈیچا مندر کے باہر رکھا گیا۔ رسمی جلوس کے بعد اتوار کو دیوتاؤں کو مندر کے اندر لے جایا جائے گا۔ دریں اثنا، بھگوان جگن ناتھ کے درشن کے لیے عقیدت مندوں کی بڑی بھیڑ جمع ہو رہی ہے۔ ہر کوئی بھگوان جگن ناتھ کی ایک جھلک دیکھنے کے لیے بے تاب نظر آتا ہے
اس سے پہلے ہفتے کے روز، رتھ یاترا کے دوران بیمار ہونے والے 600 سے زیادہ عقیدت مندوں کا پوری کے مختلف اسپتالوں میں علاج کیا گیا تھا۔ جھڑپوں سے متعدد افراد زخمی ہوئے جب کہ گرم اور مرطوب موسم کے باعث 200 سے زائد افراد بے ہوش ہوگئے۔ سالانہ رتھ یاترا سخت سیکورٹی کے درمیان منعقد کی جا رہی ہے جس میں اڈیشہ پولیس، سینٹرل آرمڈ پولیس فورس (سی اے پی ایف)، نیشنل سیکورٹی گارڈ (این ایس جی) کے تقریباً 10,000 جوانوں کی تعیناتی ہے۔ پولیس نے رتھ یاترا کے پرامن انعقاد کے لیے تمام انتظامات کر لیے ہیں۔ پولیس کے ڈائریکٹر جنرل خرانیہ نے کہا کہ ہجوم کی نگرانی کے لیے 275 سے زیادہ اے آئی (مصنوعی ذہانت) سے لیس سی سی ٹی وی کیمرے نصب کیے گئے ہیں
