نئی دہلی:سپریم کورٹ نے منگل کو دہلی کے چندی چوک کے فتح پوری علاقے میں رہائشی اور تجارتی عمارتوں کو گرانے پر روک لگا دی۔ درحقیقت، عدالت علاقے میں جاری غیر قانونی تعمیرات کے معاملے کی سماعت کر رہی تھی۔ اس دوران عدالت نے میونسپل کارپوریشن آف دہلی (ایم سی ڈی) کو بھی پھٹکار لگائی۔
دوران سماعت عدالت نے کہا کہ رہائشی علاقے کو کمرشل بلڈنگ میں تبدیل کیا جا رہا ہے۔ جس کی وجہ سے عدالت نے رہائشی جگہوں کو کمرشل عمارتوں میں غیر مجاز طور پر تبدیل کرنے سے روکنے کی ہدایات بھی دی ہیں۔ جسٹس سوریہ کانت اور جسٹس این کوٹیشور سنگھ کی بنچ نے ایک مداخلت کار کے ذریعہ پیش کردہ علاقے کی تصاویر کی جانچ کی اور تجارتی کمپلیکس کی تعمیر کو روکنے میں ناکام ہونے پر ایم سی ڈی کی کھنچائی کی۔
سپریم کورٹ نے ایم سی ڈی کو تمام تفصیلات کے ساتھ اسٹیٹس رپورٹ داخل کرنے کی ہدایت دی۔ بنچ نے واضح کیا کہ اگر ایسا نہیں کیا گیا تو ان کے خلاف توہین عدالت کی کارروائی شروع کی جائے گی یا یہ نتیجہ اخذ کیا جائے گا کہ وہ بلڈرز کے ساتھ ملی بھگت میں ملوث ہیں۔ بنچ نے حکم دیا کہ اس دوران رہائشی عمارتوں کو گرانا اور کمرشل کمپلیکس کی تعمیر و تبدیلی پر پابندی ہے۔
ایم سی ڈی کی طرف سے پیش ہونے والے وکیل نے کہا کہ عدالتی حکم کی تعمیل میں ایک ٹیم نے علاقے کا دورہ کیا اور پورے کمپلیکس اور آس پاس کے علاقوں کا معائنہ کیا اور رپورٹ پیش کی۔ انہوں نے کہا کہ تعطیلات کی وجہ سے رپورٹ کو ریکارڈ پر نہیں رکھا جا سکا اور یقین دلایا کہ تمام غیر قانونی تعمیرات ہٹا دی گئی ہیں۔
عدالت عظمیٰ ایک عرضی گزار کی درخواست پر سماعت کر رہی تھی، جس نے دعویٰ کیا تھا کہ اس علاقے میں مبینہ طور پر میونسپل کارپوریشن کے اہلکاروں کی ملی بھگت سے غیر قانونی تعمیراتی کام چل رہا ہے۔ بنچ نے ان سے کہا کہ وہ کچھ آزاد آرکیٹیکٹس اور سول انجینئرز کے نام تجویز کریں جو معائنہ کے لیے جائے وقوعہ کا دورہ کریں اور عدالت کو رپورٹ پیش کریں۔
عدالت عظمیٰ نے کہا کہ ہم جائے وقوع کا معائنہ کرنا چاہتے ہیں کیونکہ ہم ایم سی ڈی حکام کی رپورٹ پر بھروسہ نہیں کر سکتے۔ اس کے ساتھ ہی بنچ نے کیس کی اگلی سماعت کے لیے 23 مئی کی تاریخ مقرر کی ہے۔ 17 فروری کو سپریم کورٹ نے دہلی کے مصروف چاندنی چوک علاقے میں مبینہ غیر قانونی تعمیرات اور اسے روکنے میں ایم سی ڈی کی ناکامی کی سی بی آئی جانچ کا حکم دینے پر غور کیا تھا۔
ایم سی ڈی کی جانب سے پیش ہونے والے وکیل نے دعویٰ کیا کہ یہ تعمیر پرانی ہے۔ اس پر عدالت نے کہا کہ پورے رہائشی علاقے کو کمرشل پراجیکٹ میں تبدیل کر دیا گیا ہے اور آپ کہہ رہے ہیں کہ یہ پرانی تعمیر ہے۔ اس پر جب وکیل نے کہا کہ درخواست گزار ہندوستانی نہیں ہے تو بنچ نے کہا کہ اگر وہ ہندوستانی شہری نہیں ہے تو کیا آپ کچھ کرسکتے ہیں؟ ہزاروں شہری خاموشی سے اس کا خمیازہ بھگت رہے ہیں۔
بنچ نے افسوس کا اظہار کیا کہ 13 فروری 2025 تک مکانات گرائے جا رہے ہیں اور کمرشل تعمیر ہو رہی ہے اور آپ لوگ خاموش ہیں۔ رہائشی مکانات گرائے گئے ہیں، کیا آپ یہ نہیں دیکھ رہے؟
