نئی دہلی:سپریم کورٹ کے چیف جسٹس ڈی وائی چندر چوڑ نے اپنے آخری فیصلے میں بلڈوزر کی کارروائی کی سخت مذمت کی۔ انہوں نے کہا کہ قانون کی حکمرانی میں بلڈوزر کے ذریعے انصاف قبول نہیں۔ کسی کی جائیداد تباہ کر کے انصاف نہیں دیا جا سکتا۔ بلڈوزر استعمال کرنے کی دھمکی دے کر عوام کی آواز کو نہیں دبایا جا سکتا۔ یہ قانون کی نظر میں درست نہیں۔ یہ قبول نہیں کیا جا سکتا۔
چیف جسٹس ڈی وائی چندر چوڑ، جسٹس جے بی پارڈی والا اور جسٹس منوج مشرا کی بنچ نے کہا کہ بلڈوزر کے ذریعے انصاف کی فراہمی کسی بھی مہذب نظام انصاف کا حصہ نہیں ہو سکتی۔ تین ججوں کی بنچ نے کہا کہ ریاستوں کو غیر قانونی تجاوزات کو ہٹانے کے لیے کارروائی کرنے سے پہلے قانون کے مطابق عمل کرنا چاہیے۔ بلڈوزر انصاف قبول نہیں۔
سی جے آئی چندرچوڑ کی سربراہی والی بنچ نے کہا کہ اگر اس کی اجازت دی گئی تو آرٹیکل 300 اے کے تحت جائیداد کے حق کی آئینی شناخت ختم ہو جائے گی۔ آئین کا آرٹیکل 300اے کہتا ہے کہ قانون کی عملداری کے بغیر کسی بھی شخص کو اس کی جائیداد سے محروم نہیں کیا جائے گا۔ دراصل، سپریم کورٹ نے یوپی کے مہاراج گنج میں بلڈوزر کی کارروائی پر اپنا فیصلہ سنایا تھا۔ اس دوران سپریم کورٹ نے یوگی حکومت کو پھٹکار لگائی۔ عدالت نے یوپی حکومت کو معاوضہ ادا کرنے کا بھی حکم دیا تھا۔
یوگی حکومت کے بلڈوزر ایکشن پر چیف جسٹس ڈی وائی چندر چوڑ نے کہا کہ آپ لوگوں کے گھر اس طرح گرانا کیسے شروع کر سکتے ہیں؟ کسی کے گھر میں گھسنا انتشار ہے۔ یہ مکمل طور پر من مانی ہے۔ کہاں مناسب طریقہ کار کی پیروی کی گئی ہے؟ چیف جسٹس نے کہا کہ ہمارے پاس بیان حلفی ہے، جس میں کہا گیا ہے کہ کوئی نوٹس جاری نہیں کیا گیا۔ آپ صرف سائٹ پر گئے اور لوگوں کو آگاہ کیا۔ کیا یہ انصاف کا مقصد پورا کرے گا؟ چندر چوڑ نے کہا کہ جس شخص کا مکان منہدم ہوا ہے اس کو 25 لاکھ روپے کا معاوضہ دیا جائے۔
چیف جسٹس ڈی وائی چندر چوڑ آج سپریم کورٹ سے ریٹائر ہو جائیں گے۔ 9 نومبر 2022 کو انہوں نے سپریم کورٹ کے چیف جسٹس کا عہدہ سنبھالا۔ جسٹس سنجیو کھنہ ہندوستان کے اگلے چیف جسٹس ہوں گے۔
