وائناڈ:کیرالہ کے وائناڈ ضلع میں میپاڈی کے قریب پہاڑی علاقوں میں آج علی الصباح ایک زبردست لینڈ سلائیڈنگ ہوئی جس کے بعد چاروں طرف تباہی نظر آنے لگی۔ سینکڑوں افراد کے ملبے تلے دبے ہونے کا خدشہ ہے۔ کیرالہ اسٹیٹ ڈیزاسٹر مینجمنٹ اتھارٹی (کے ایس ڈی ایم اے) نے کہا ہے کہ متاثرہ علاقے میں فائر فورس اور این ڈی آر ایف کی ٹیمیں تعینات کردی گئی ہیں۔ اس کے علاوہ این ڈی آر ایف کی ایک اور ٹیم ویاناڈ پہنچ گئی ہے۔ فوج نے بھی مورچہ سنبھال لیا ہے۔ ریسکیو آپریشن تیزی سے جاری ہے۔ ادھر ریاستی وزیر صحت وینا جارج نے کہا ہے کہ مرنے والوں کی تعداد 11 ہو گئی ہے۔ چھ لاشیں میپاڈی کمیونٹی ہیلتھ سنٹر اور پانچ کو نجی میڈیکل کالج لایا گیا ہے۔
ہندوستانی فوج نے کہا ہے کہ کیرالہ کے وائناڈ میں میپاڈی پنچایت میں مٹی کے تودے گرنے سے بھاری نقصان ہوا ہے۔ سینکڑوں افراد کے پھنسے ہونے کا خدشہ ہے۔ آج صبح فوج کو سول اتھارٹی کو مدد فراہم کرنے کی درخواست موصول ہوئی۔ جواب میں، فوج نے چار دستوں کو متحرک کیا ہے، جن میں 122 انفنٹری بٹالین (علاقائی فوج) کے دو دستے اور کنور کے ڈی ایس سی سینٹر سے دو دستے شامل ہیں۔ ریسکیو آپریشن کے لیے اب تک تعینات فوجیوں کی کل تعداد 225 کے لگ بھگ ہے جن میں طبی عملہ بھی شامل ہے۔
کیرالہ کی وزیر صحت وینا جارج نے کہا ہے کہ ویاناڈ لینڈ سلائیڈنگ کے پیش نظر محکمہ صحت نے ضلع سطح کا کنٹرول روم کھولا اور ہنگامی صحت کی خدمات کے لیے دو ہیلپ لائن نمبر جاری کیے ہیں۔ ویتھیری، کلپٹہ، میپاڈی اور منانتھوادی اسپتالوں کو الرٹ پر رکھا گیا ہے، جہاں ہر طرح کی تیاریاں کی گئی ہیں۔ تمام ہیلتھ ورکرز رات کو ہی سروس کے لیے پہنچ گئے تھے۔ صحت کارکنوں کی مزید ٹیمیں وایناڈ میں تعینات کی جائیں گی۔
محکمہ صحت نے کہا کہ نیشنل ہیلتھ مشن نے ایک کنٹرول روم کھولا ہے اور ہنگامی امداد کے لیے ہیلپ لائن نمبر 9656938689 اور 8086010833 جاری کیے ہیں۔ فضائیہ کے دو ہیلی کاپٹر ایم آئی-17 اور ایک اے ایل ایچ کو ریسکیو کے لیے تعینات کیا گیا ہے لیکن شدید بارش کے باعث وہ ٹیک آف نہیں کر پا رہے ہیں۔ دریں اثنا، مرکزی وزیر راجیو چندر شیکھر نے ٹویٹ کیا کہ کل رات سے وائناڈ میں کئی مٹی کے تودے گرنے کے بارے میں سن کر وہ افسردہ ہیں۔ میں ریاستی حکومت سے اپیل کرتا ہوں کہ متاثرہ خاندانوں کو جلد از جلد امداد فراہم کی جائے۔
مرکز ہر ممکن مدد فراہم کرے گا: پی ایم مودی
وزیر اعظم نریندر مودی نے ٹویٹ کیا ہے کہ وہ وایناڈ کے کچھ حصوں میں مٹی کے تودے گرنے سے پریشان ہیں۔ میرے خیالات ان تمام لوگوں کے ساتھ ہیں جنہوں نے اپنے پیاروں کو کھو دیا ہے اور زخمیوں کے لیے دعائیں ہیں۔ اس وقت تمام متاثرہ افراد کی مدد کے لیے ریسکیو آپریشن جاری ہے۔ کیرالہ کے وزیر اعلی جناب پنارائی وجین سے بات کی اور وہاں کی موجودہ صورتحال کے پیش نظر مرکز کی طرف سے ہر ممکن مدد کا یقین دلایا۔
پی ایم مودی نے لینڈ سلائیڈنگ میں ہلاک ہونے والوں کے لواحقین کو وزیر اعظم کے قومی ریلیف فنڈ سے 2 لاکھ روپے کے معاوضے کا اعلان کیا ہے۔ اس کے علاوہ زخمیوں کو 50 ہزار روپے کی امداد دی جائے گی۔
لینڈ سلائیڈنگ میں پھنسے لوگوں کو جلد از جلد نکالا جائے گا: راہل گاندھی
کانگریس لیڈر راہل گاندھی نے وائناڈ میں میپاڈی کے قریب بڑے پیمانے پر لینڈ سلائیڈنگ پر گہرے دکھ کا اظہار کیا ہے۔ انہوں نے کہا کہ میری دلی تعزیت ان سوگوار خاندانوں کے ساتھ ہے جنہوں نے اپنے پیاروں کو کھو دیا ہے۔ مجھے امید ہے کہ جو لوگ ابھی تک پھنسے ہوئے ہیں انہیں جلد بحفاظت نکال لیا جائے گا۔ میں نے کیرالہ کے وزیر اعلیٰ اور وایناڈ کے ضلع کلکٹر سے بات کی ہے، جنہوں نے مجھے یقین دلایا ہے کہ ریسکیو آپریشن جاری ہے۔ میں نے ان سے درخواست کی ہے کہ وہ تمام ایجنسیوں کے ساتھ ہم آہنگی کو یقینی بنائیں، ایک کنٹرول روم قائم کریں اور امدادی سرگرمیوں کے لیے درکار کسی بھی مدد کے بارے میں ہمیں آگاہ کریں۔ میں مرکزی وزراء سے بات کروں گا اور ان سے ویاناڈ کو ہر ممکن مدد فراہم کرنے کی درخواست کروں گا۔ میں یوڈی ایف کے تمام کارکنوں سے اپیل کرتا ہوں کہ وہ بچاؤ اور راحت کے کاموں میں انتظامیہ کی مدد کریں۔
وزیر ویاناڈ کا دورہ کریں گے: سی ایم
کیرالہ کے وزیر اعلیٰ پنارائی وجین نے ایک بیان میں کہا کہ وایناڈ میں تودے گرنے سے بچاؤ کا کام تیزی سے کیا جا رہا ہے۔ وزیر اعلیٰ نے کہا کہ جب سے ہمیں اس واقعہ کا علم ہوا ہے، حکومتی مشینری نے ریسکیو آپریشن میں ساتھ دیا ہے۔ وزیر ویاناڈ کا دورہ کریں گے اور سرگرمیوں کی قیادت کریں گے۔
