نئی دہلی:کانگریس لیڈر راہل گاندھی نے وزیر اعظم نریندر مودی کو نشانہ بنایا ہے۔ راہل گاندھی نے الزام لگایا کہ نریندر مودی نے اپنے ارب پتی دوستوں کے 16000000000000 روپے یعنی 16 لاکھ کروڑ روپے کا قرض معاف کر دیا ہے۔ اتنی رقم سے ملک کے 16 کروڑ نوجوانوں کو سالانہ ایک لاکھ روپے کی نوکریاں مل سکتی تھیں۔ اس کے علاوہ 16 کروڑ خواتین کو سالانہ ایک لاکھ روپے دینے سے ان کے خاندانوں کی زندگیاں بدل سکتی تھیں۔ یہی نہیں کانگریس لیڈر نے وزیر اعظم پر سرمایہ داروں کے لیے کام کرنے کا الزام بھی لگایا۔
دراصل راہل گاندھی نے سوشل میڈیا پر ٹویٹ کیا اور الزام لگایا کہ پی ایم مودی نے اپنے ارب پتی دوستوں کو فائدہ پہنچایا۔ انہوں نے کہاکہ10 کروڑ کسان خاندانوں کے قرضے معاف کر کے ملک میں بے شمار خودکشیوں کو روکا جا سکتا تھا، اس کے ساتھ اگلے 20 سالوں کے لیے پورے ملک کو صرف 400 روپے میں گیس سلنڈر دیا جا سکتا تھا۔
اس کے علاوہ کانگریس کے رہنما راہل گاندھی نے کہا کہ اس رقم سے اگلے 3 سال تک ہندوستانی فوج کے تمام اخراجات پورے کیے جا سکتے تھے، ساتھ ہی ملک بھر میں دلت، قبائلی اور پسماندہ طبقے کے ہر نوجوان کی گریجویشن تک کی تعلیم بھی مفت ہو سکتی تھی انہوں نے مزید کہاکہ جو پیسہ ہندوستانیوں کے درد کی دوا بن سکتا تھا، وہ پیسہ اڈانیوں کے لیے خرچ کیا گیا، ایسے میں کانگریس کے اس نعرے کے لیے یہ ملک نریندر مودی کو کبھی معاف نہیں کرے گا۔اب حالات بدلیں گے – کانگریس ہر ہندوستانی کی ترقی کے لیے حکومت چلائے گی۔
