نئی دہلی:دہلی میں، آج یعنی 31 مارچ کو، مبینہ شراب گھوٹالہ میں سی ایم اروند کیجریوال کی گرفتاری کے خلاف رام لیلا میدان میں انڈیا الائنس کی ایک عظیم الشان ریلی بلائی گئی ہے۔ اس ریلی کا نام ’’آمریت ہٹاؤ، جمہوریت بچاؤ‘‘ رکھا گیا ہے، اس میگا ریلی میں تقریباً 28 جماعتیں حصہ لے رہی ہیں۔ اس ریلی میں سی ایم کیجریوال کی اہلیہ سنیتا کیجریوال سی ایم کیجریوال کا پیغام پڑھیں گی۔آپ پارٹی نے دعویٰ کیا ہے کہ اروند کیجریوال نے ای ڈی کی حراست سے ملک کو پیغام دیا ہے۔ جسے ان کی اہلیہ پورے ملک کے سامنے پڑھیں گی۔ اس کے علاوہ سونیا گاندھی اور اپوزیشن لیڈر بھی اسٹیج پر نظر آئیں گے۔
دہلی کے رام لیلا میدان میں ہونے والی اس ریلی میں کانگریس صدر ملکارجن کھرگے، راہل گاندھی، شرد پوار، ادھو ٹھاکرے، اکھلیش یادو، تیجسوی یادو، فاروق عبداللہ اور محبوبہ مفتی شرکت کر سکتے ہیں۔ عام آدمی پارٹی نے اس میگا ریلی کا اعلان دہلی کے سی ایم اروند کیجریوال کی گرفتاری کے بعد کیا تھا۔ اس ریلی کی بڑے پیمانے پر تیاریاں کی گئی ہیں۔
‘مہاریلی سے پہلے، مہاراشٹر کے سابق وزیر اعلی اور شیوسینا (یو بی ٹی) کے صدر ادھو ٹھاکرے نے بی جے پی کے پی سی پر کہاکہ وہ (بی جے پی) خاندان کا مطلب نہیں سمجھتے ہیں۔میرا خاندان کہنے سے کوئی فائدہ نہیں ہوتا، خاندان کی ذمہ داری لینا پڑتی ہے۔ آپ کے خاندان میں صرف کرسی اور آپ ہیں۔ اب ان کے پاس کوئی اور مضمون باقی نہیں رہا۔ جب سے انتخابی بانڈز کا معاملہ سامنے آیا ہے، ان کا اصل چہرہ عوام کے سامنے آ گیا ہے۔ بی جے پی کا مطلب ہے کرپٹ جنتا پارٹی۔
سی پی آئی کے جنرل سکریٹری ڈی راجہ نے مہارالی کے بارے میں کہاکہ آج کی ریلی بہت اہم ریلی ہے۔ یہ ریلی وزیر اعلی اروند کیجریوال کی گرفتاری کے فوراً بعد ہو رہی ہے۔ اس سے پہلے جھارکھنڈ کے وزیر اعلیٰ کو عہدہ چھوڑنا پڑا، انہیں گرفتار کر لیا گیا۔ اب موجودہ وزیر اعلیٰ کو گرفتار کر لیا گیا ہے۔ تمام مرکزی ایجنسیاں اپوزیشن جماعتوں کے خلاف استعمال ہو رہی ہیں۔ اس لیے اس ریلی کو ’جمہوریت بچاؤ ریلی‘ کا نام دیا گیا ہے۔ یہ ریلی پورے ملک کو ایک بڑا پیغام دینے والی ہے۔
آپ لیڈر سومناتھ بھارتی نے مہاریلی کے بارے میں کہاکہ ریلی کا پیغام ہے کہ ملک کا آئین اور جمہوریت خطرے میں ہے۔ اس وقت، جو بھی مادر ہند سے پیار کرتا ہے، جو بھی چاہتا ہے کہ ہندوستان کا آئین زندہ رہے، ہر شخص آج کی ریلی کا حصہ بنے گا… ہم سب کو متحد ہونا ہوگا۔
انڈیا بلاک ریلی پر، آپ کی وزیر آتشی نے کہاکہ صبح کے 10 بجے ہیں اور لوگ پہلے ہی بڑی تعداد میں جمع ہو چکے ہیں۔ اروند کیجریوال کی گرفتاری کے خلاف ملک بھر سے لوگ یہاں آئے ہیں۔ دہلی کے لوگ جانتے ہیں کہ کیجریوال نے ان کی زندگی بدل دی ہے۔ وہ گرفتار ہیں، پھر بھی وہ دہلی کے بارے میں فکر مند ہیں اور ان کے لیے پیغامات بھیج رہے ہیں۔
دہلی پولیس نے رام لیلا میدان میں ہونے والی انڈیا الائنس کی اس میگا ریلی کے لیے 20 ہزار لوگوں کے جمع ہونے کی اجازت دے دی ہے۔ دہلی پولیس نے ٹریفک ایڈوائزری بھی جاری کی، جس کے ساتھ پولیس نے کہا کہ شہر میں گاڑیوں کی نقل و حرکت کو چھ گھنٹے تک کنٹرول کیا جائے گا۔ صبح 9 بجے سے سہ پہر 3 بجے تک ٹریفک کی نقل و حرکت کو کنٹرول کیا جائے گا اور ٹریفک کو بھی محدود کیا جا سکتا ہے۔ کئی مقامات پر ٹریفک کے راستے بھی تبدیل کیے جا سکتے ہیں۔ رام لیلا میدان میں سیکورٹی کے وسیع انتظامات کئے گئے ہیں تاکہ عام لوگوں کو ریلی کی وجہ سے کسی قسم کی پریشانی کا سامنا نہ کرنا پڑے۔ اس کے علاوہ رام لیلا میدان کے قریب ٹریفک اور پارکنگ کو کنٹرول کرنے کے لیے ٹریفک پولیس کو بھی تعینات کیا جائے گا۔
