نئی دہلی:ایک طرف کانگریس آئندہ لوک سبھا انتخابات میں تمام اپوزیشن پارٹیوں کو متحد کرکے بی جے پی کو شکست دینے کی تیاری کر رہی ہے، وہیں دوسری طرف پارٹی کے اپنے لیڈران اسے چھوڑ رہے ہیں۔ مہاراشٹر میں پارٹی سے ملند دیورا، بابا صدیقی، اشوک چوان کے استعفیٰ کے بعد اب کانگریس کو مدھیہ پردیش سے بڑا جھٹکا لگا ہے۔ سابق مرکزی وزیر اور مدھیہ پردیش کانگریس کے سابق صدر سریش پچوری پارٹی سے الگ ہو کر بی جے پی میں شامل ہو گئے ہیں۔
معلومات کے مطابق سریش پچوری ہفتہ 9 مارچ کو بی جے پی میں شامل ہوئے تھے۔ انہوں نے راجدھانی بھوپال میں پارٹی کی رکنیت لی۔ اس دوران ریاست کے سابق وزیر اعلی شیوراج سنگھ چوہان نے ان کا استقبال کیا۔بتایا جا رہا ہے کہ پچوری کے ساتھ کانگریس کے کئی بڑے لیڈر بی جے پی میں شامل ہو چکے ہیں۔ ان میں اتل شرما، کیلاش مشرا، سابق ضلع صدر کانگریس، سنجے شکلا، وشال پٹیل سمیت کئی بڑے لیڈر شامل ہیں۔ یہ سبھی سریش پچوری کے حامی مانے جاتے ہیں۔
بی جے پی میں شامل ہونے کے بعد سریش پچوری نے کہا کہ کانگریس ان اصولوں اور پالیسیوں سے ہٹ گئی ہے جن کے لیے اسے جانا جاتا تھا۔ پچوری نے کہا کہ کانگریس خود کو عوام سے الگ کر چکی ہے اور اب تعلقات برقرار رکھنے میں ناکام ہے۔
سریش پچوری کا شمار کانگریس کے طاقتور لیڈروں میں ہوتا ہے۔ وہ چار بار راجیہ سبھا کے رکن اور مرکز میں وزیر کے ساتھ ساتھ ریاستی صدر بھی رہ چکے ہیں۔ وہ گاندھی خاندان کے بہت قریب مانے جاتے ہیں۔ سریش پچوری نے اپنے سیاسی سفر کا آغاز 1972 میں کانگریس کارکن کے طور پر کیا تھا۔ ۔1984 میں وہ ریاستی یوتھ کانگریس کے صدر بنے۔ وہ پی وی نرسمہا راؤ اور منموہن سنگھ کی حکومتوں میں وزیر بھی رہے۔ اس دوران انہوں نے کئی محکموں کا چارج سنبھالا۔
دلچسپ بات یہ ہے کہ سریش پچوری نے آج تک کوئی الیکشن نہیں جیتا ہے، پھر بھی ان کا شمار کانگریس کے تجربہ کار لیڈروں میں ہوتا ہے۔ انہوں نے اپنے سیاسی کیرئیر میں صرف دو بار الیکشن لڑا۔ انہوں نے 1999 کا لوک سبھا الیکشن بھوپال سے لڑا۔ جہاں ان کا مقابلہ بی جے پی کی بھڑکیلی لیڈر اوما بھارتی سے تھا۔ اس الیکشن میں سریش پچوری کو 1.6 لاکھ سے زیادہ ووٹوں سے شکست ہوئی تھی۔ انہوں نے بھوجپور سے 2013 کا اسمبلی الیکشن لڑا تھا۔ یہاں ان کا مقابلہ سریندر پٹوا سے تھا۔سریش پچوری کو اس الیکشن میں بھی شکست کا منہ دیکھنا پڑا۔
اپنے سیاسی سفر کے دوران، سریش پچوری پہلی بار 1984 میں راجیہ سبھا کے لیے منتخب ہوئے اور 1990، 1996 اور 2002 میں دوبارہ راجیہ سبھا بھیجے گئے۔ وہ وزیر مملکت برائے دفاع، عملہ، عوامی شکایات اور پنشن اور پارلیمانی امور کے وزیر بھی رہے۔ 2008 سے 2011 تک پچوری نے مدھیہ پردیش کانگریس کمیٹی کے صدر کی ذمہ داری نبھائی۔ 2019 کے لوک سبھا انتخابات میں سریش پچوری کو لوک سبھا انتخابات کا انچارج بھی بنایا گیا تھا۔ وہ 2023 کے انتخابات کے لیے اسکریننگ کمیٹی کے رکن بھی رہ چکے ہیں۔
