لکھنؤ:اتر پردیش کی راجدھانی لکھنؤ میں منگل کی رات ایک زبردست آگ لگنے کا واقعہ پیش آیا۔ یہاں ایک گھر میں سلنڈر میں زوردار دھماکہ ہونے سے ایک ہی خاندان کے پانچ افراد کی موت ہو گئی ہے اور چار افراد کی حالت تشویشناک ہے۔ اس واقعہ کی اطلاع ملتے ہی فائر بریگیڈ کی ٹیم نے کافی کوشش کے بعد آگ پر قابو پالیا۔
معلومات کے مطابق یہ واقعہ لکھنؤ کے کاکوری کے حضرت صاحب کاکوری قصبہ میں پیش آیا۔ یہاں رہنے والے مشیر علی باورچی کا کام کرتے تھے۔ یہاں دو سلنڈروں سے کھانا پکایا جاتا تھا۔ عینی شاہدین کا کہنا ہے کہ پہلے آگ شارٹ سرکٹ کے باعث لگی، پھر آگ کے شعلوں نے سلنڈر کو لپیٹ میں لے لیا اور دونوں سلنڈر پھٹ گئے۔ حادثے کی اطلاع ملتے ہی ڈی سی پی درگیش کمار، اے ڈی سی پی وشواجیت سریواستو، اے سی پی اور سی ایف او اور فائر ڈیپارٹمنٹ کی ٹیم پہنچ گئی۔
فائر بریگیڈ نے لوگوں کو بچا لیا۔ پولیس نے بجلی کے محکمے کو اطلاع دی اور لائٹس بند کروا دیں۔ فائر بریگیڈ کے اہلکاروں نے سخت محنت کی اور اندر پھنسے لوگوں کو باہر نکالا۔ کاکوری پولیس انہیں ایمبولینس کے ذریعے اسپتال لے گئی جہاں ڈاکٹروں نے پانچ افراد کو مردہ قرار دے دیا۔ جاں بحق ہونے والوں کی شناخت مشیر علی اور ان کی اہلیہ حسنہ بانو، بھتیجی ہما، حبا اور بھتیجی رائیا کے نام سے ہوئی ہے۔ اس دوران مشیر کی دو بیٹیاں، ایک بھانجی اور بیٹا اجمت زخمی ہو گئے۔ منگل کو مشیر کی شادی کی سالگرہ تھی۔ بہنوئی اجمت تین بچوں کو لے کر مشیر کے گھر آئے تھے۔
پولیس معاملے کی جانچ میں مصروف ہے۔ ایک سینئر پولیس افسر نے بتایا کہ ریسکیو کارکنوں کو دھوئیں کی وجہ سے لوگوں کو بچانے میں کافی دشواری کا سامنا کرنا پڑا۔ فائر فائٹرز کو مقامی لوگوں نے بھی مدد فراہم کی۔ تین گھنٹے کی محنت کے بعد آگ پر قابو پایا جا سکا۔
