نئی دہلی :جمعیۃ علمائے ہند کے صدر مولانا محمود اسعد مدنی نے ملک میں ہونے والی ذات پر مبنی مردم شماری کی بھرپور حمایت کرتے ہوئے ایک اہم بیان جاری کیا ہے۔ انہوں نے امید ظاہر کی ہے کہ یہ عمل منصفانہ حکمرانی، درست پالیسی سازی اور وسائل کی مساوی تقسیم کو یقینی بنائے گا۔مولانا مدنی نے کہا کہ ذات پر مبنی مردم شماری اب محض ایک سرکاری کارروائی نہیں رہی، بلکہ یہ ایک سماجی اور سیاسی ضرورت بن چکی ہے۔ اس سے حاصل ہونے والے اعداد و شمار کا براہ راست اثر ریزرویشن پالیسی، سماجی ترقیاتی منصوبوں اور فلاحی فوائد کی منصفانہ تقسیم پر پڑے گا۔
اس حوالے سے مولانا مدنی نے ملک کے تمام مسلمانوں سے اپیل کی ہے کہ وہ اس مردم شماری کے عمل میں سرگرم حصہ لیں۔ ہر مسلم خاندان کو یہ یقینی بنانا چاہیے کہ ان کی رائج ذات کی شناخت درست طریقے سے درج کی جائےجمعیۃ علمائے ہند کی مقامی شاخوں، تمام مسلم تنظیموں، دینی اداروں اور کمیونٹی کے رہنماؤں سے بھی درخواست کی گئی ہے کہ وہ عام لوگوں کی رہنمائی کریں اور انہیں اس عمل کے طویل مدتی اثرات سے آگاہ کریں۔
مولانا مدنی نے یہ بھی واضح کیا کہ یہ اقدام اسلامی مساوات کے اصولوں کے خلاف نہیں ہے بلکہ ایک عملی ضرورت ہے۔ انہوں نے کہا کہ اگرچہ اسلام مساوات پر مبنی سماج کی حمایت کرتا ہے لیکن بھارت میں مسلمانوں کی ایک بڑی آبادی سماجی و اقتصادی طور پر پسماندہ رہ گئی ہے۔ اب وقت آگیا ہے کہ ہم اسے ایک اخلاقی اور آئینی فریضہ سمجھ کر، سب سے زیادہ محروم طبقوں—خصوصاً پسماندہ اور کمزور مسلمانوں—کو انصاف دلانے کی کوشش کریں۔
ہم حکومت ہند سے مطالبہ کرتے ہیں کہ ذات پر مبنی مردم شماری میں شفافیت، غیر جانبداری اور سنجیدگی کے ساتھ کام کیا جائے اور کسی بھی طبقے کے ساتھ امتیاز نہ برتا جائے
