اندور (پی ٹی آئی)— مدھیہ پردیش کے وزیر وجے شاہ کے خلاف بدھ کی شب ضلع اندور میں کرنل صوفیہ قریشی کے بارے میں مبینہ طور پر قابل اعتراض ریمارکس دینے پر ایف آئی آر درج کی گئی۔
وزیر اعلیٰ موہن یادو نے ایکس (سابقہ ٹوئٹر) پر پوسٹ کرتے ہوئے کہا کہ مدھیہ پردیش ہائی کورٹ کے احکامات کے بعد وزیر شاہ کے خلاف کارروائی کے لیے ہدایات دی گئی ہیں۔
ایک پولیس افسر نے بتایا کہ ایف آئی آر مانپور پولیس اسٹیشن میں درج کی گئی ہے۔ دیہی سپرنٹنڈنٹ آف پولیس ہتیکا واسل نے اس پیشرفت کی تصدیق کی۔
ایف آئی آر ان دفعات کے تحت درج کی گئی ہے:
دفعہ 152: ایسا عمل جو ہندوستان کی خودمختاری، اتحاد اور سالمیت کو خطرے میں ڈالے۔
دفعہ 196 (1)بی: ایسا عمل جو مختلف برادریوں کے درمیان باہمی ہم آہنگی کو نقصان پہنچائے اور عوامی امن میں خلل ڈالنے کا سبب بنے یا بن سکتا ہو۔
دفعہ 197 (1)سی: کسی برادری کے رکن کے بارے میں ایسا بیان دینا جو مختلف برادریوں کے درمیان ہم آہنگی پر منفی اثر ڈالے۔
شاہ نے پیر کے روز ضلع اندور کے ایک دیہی علاقے میں ایک عوامی تقریب کے دوران متنازع بیان دیا تھا، اگرچہ انہوں نے کرنل قریشی کا نام نہیں لیا تھا۔
کرنل صوفیہ قریشی نے بھارتی مسلح افواج کی جانب سے شروع کیے گئے آپریشن سندور کی تفصیلات سیکریٹری خارجہ وکرم مسری اور ونگ کمانڈر ویومیکا سنگھ کے ساتھ مشترکہ پریس کانفرنسوں میں پیش کی تھیں۔
بیان پر شدید تنازع کھڑا ہونے کے بعد، شاہ نے کہا کہ اگر کسی کو ان کے بیان سے دکھ پہنچا ہو تو وہ دس بار معذرت کرنے کے لیے تیار ہیں۔ انہوں نے یہ بھی کہا کہ وہ کرنل قریشی کا اتنا احترام کرتے ہیں جتنا اپنی بہن کا بھی نہیں کرتے۔
