مسلم پرسنل لا بورڈ کا تحفظ اوقاف کنونشن ٹالکٹورہ اسٹیڈیم میں آج

نئی دہلی : وقف ترمیمی قانون کے خلاف جاری ملک گیر احتجاج کے تحت آل انڈیا مسلم پرسنل لا بورڈ آج 22 اپریل بروز منگل صبح 10 بجے تالکوٹورہ انڈور اسٹیڈیم، نئی دہلی میں “تحفظِ اوقاف کانفرنس” منعقد کرے گا۔
اس اہم اجلاس کی صدارت بورڈ کے صدر مولانا خالد سیف اللہ رحمانی کریں گے۔ کانفرنس کے داعیوں میں بورڈ کے نائب صدور مولانا سید ارشد مدنی، مولانا عبید اللہ خاں اعظمی، سید سعادت اللہ حسینی، مولانا اصغر امام مہدی سلفی، مولانا محمد علی محسن نقوی، مولانا سید محمود اسعد مدنی، جنرل سکریٹری مولانا فضل الرحیم مجددی اور ترجمان ڈاکٹر سید قاسم رسول الیاس شامل ہیں۔ اس کانفرنس سے ملک کی نامور مسلم شخصیات، اپوزیشن جماعتوں کے قائدین، اراکین پارلیمنٹ، سول سوسائٹی کے کارکنان اور اقلیتی گروپوں کے رہنما خطاب کریں گے۔ وقف ایکٹ میں حالیہ ترامیم نے وقف جائیدادوں کے انتظام و انصرام کو پیچیدہ بنا دیا ہے اور مسلمانوں کے آئینی و مذہبی حقوق کو متاثر کیا ہے۔ اس کانفرنس میں ان تمام اہم مسائل پر غور کیا جائے گا اور مستقبل کی حکمت عملی طے کی جائے گی۔ کانفرنس میں خواتین کے لیے بھی خصوصی نشستوں کا انتظام کیا گیا ہے۔