مایاوتی کا ایکشن پر ایکشن، بھتیجے کے بعد بھائی سے بھی عہدہ واپس، رندھیر بینیوال کو ذمہ داری

لکھنؤ:بی ایس پی سپریمو مایاوتی ان دنوں ایکشن موڈ میں نظر آرہی ہیں۔ پہلے انہوں نے اپنے بھتیجے آکاش آنند کو تمام عہدوں سے فارغ کیا اور اگلے دن انہیں پارٹی سے باہر کا راستہ دکھایا۔ بھتیجے کے بعد اب مایاوتی کا غصہ بھائی پر گرا ہے۔ انہوں نے آنند کمار کو قومی کنوینر کے عہدے سے ہٹا دیا ہے۔ اب وہ صرف نائب صدر ہی رہیں گے۔ نیشنل کوآرڈینیٹر کی ذمہ داری رندھیر بینیوال کو دی گئی ہے۔
مایاوتی نے ایکس پر پوسٹ کیا اور معلومات دیتے ہوئے لکھا کہ آنند کمار نے پارٹی اور تحریک کے مفاد میں کسی عہدے پر کام کرنے کی خواہش ظاہر کی تھی، جسے قبول کر لیا گیا ہے۔ اب وہ پہلے کی طرح قومی نائب صدر کے عہدے پر فائز رہتے ہوئے مایاوتی کی ہدایت پر کام کریں گے۔
انہوں نے مزید لکھا کہ اس کے ساتھ ہی سہارنپور کے رہنے والے رندھیر بینیوال کو نیا نیشنل کوآرڈینیٹر مقرر کیا گیا ہے۔ مایاوتی نے کہا کہ اب بی ایس پی کے راجیہ سبھا ممبران پارلیمنٹ رام جی گوتم اور رندھیر بینیوال، دونوں پارٹی کے قومی رابطہ کار کے طور پر، ان کی ہدایت پر مختلف ریاستوں کا چارج سنبھالیں گے۔
اس سے پہلے مایاوتی نے بڑا فیصلہ لیتے ہوئے اپنے بھتیجے آکاش آنند کو پارٹی سے نکال دیا تھا۔ مایاوتی نے آکاش کو تمام عہدوں سے فارغ کر دیا تھا۔ مایاوتی ان دنوں فل ایکشن موڈ میں نظر آرہی ہیں۔ حال ہی میں انہوں نے یوگی حکومت پر مسلمانوں سے سوتیلی ماں جیسا سلوک کرنے کا الزام بھی لگایا تھا۔
اتوار کو ہی مایاوتی نے اپنے بھائی آنند کمار کو قومی رابطہ کار مقرر کیا تھا۔ اس دوران انہوں نے کہا تھا کہ وہ پارٹی کے لیے بہتر کام کریں گے۔ صرف 3 دن یعنی 72 گھنٹے کے اندر، بی ایس پی سپریمو نے اپنا فیصلہ واپس لے لیا ہے۔ ایسے میں کئی طرح کے سوالات اٹھ رہے ہیں۔ مایاوتی ان دنوں اپنے فیصلوں کی وجہ سے سرخیوں میں ہیں۔