نئی دہلی :سنٹرل بورڈ آف سیکنڈری ایجوکیشن (سی بی ایس ای) کی ‘ڈمی اسکولوں’ کے خلاف کارروائی جاری ہے۔ کچھ عرصہ قبل بھی سی بی ایس ای نے اسکولوں کے خلاف کارروائی کرتے ہوئے ان کی شناخت منسوخ کردی تھی۔ دریں اثنا، بورڈ نے دہلی اور راجستھان میں مزید 21 اسکولوں کی شناخت منسوخ کرنے کا اعلان کیا ہے۔ اس میں دہلی کے 16 اور راجستھان کے 5 اسکول شامل ہیں۔ اس کے علاوہ دارالحکومت کے 6 اسکولوں کو سینئر سیکنڈری سے ثانوی سطح تک نیچے کردیا گیا ہے۔
بورڈ نے یہ کارروائی 3 ستمبر کو سی بی ایس ای کی طرف سے کئے گئے کئی اچانک معائنہ کے بعد کی ہے۔ بورڈ کے اس اچانک معائنہ کا مقصد بورڈ کی وابستگی اور امتحان کے ضمنی قوانین کے ساتھ اس کی تعمیل کا جائزہ لینا تھا، خاص طور پر طلباء کی حاضری کے حوالے سے۔ بورڈ کی طرف سے 6 نومبر کو جاری کردہ ایک نوٹیفکیشن میں کہا گیا کہ تعلیمی معیار کو برقرار رکھنے اور حاضری کے ساتھ وسیع تر مسائل کو حل کرنے کے لیے ڈی ایکریڈیشن اور تنزلی ضروری ہے۔
سی بی ایس ای کے مطابق، ان اداروں میں 9ویں سے 12ویں جماعت کے ڈمی اور غیر حاضر طلباء کی ایک بڑی تعداد پائی گئی اور صورتحال تشویشناک ہے۔ بورڈ نے ان طلباء کو بھی خبردار کیا ہے جو کلاسوں سے غائب ہیں۔ ساتھ ہی بورڈ حکام نے دیگر اسکولوں کو تنبیہ کی ہے کہ وہ کلاس سے غیر حاضر بچوں پر توجہ دیں بصورت دیگر ان کے خلاف بھی کارروائی کی جا سکتی ہے۔
بورڈ حکام نے کہا ہے کہ ہم ڈمی اسکولوں کے خلاف کریک ڈاؤن کے لیے فیصلہ کن کارروائی کر رہے ہیں اور تمام الحاق شدہ اداروں کو واضح پیغام دے رہے ہیں کہ وہ ڈمی یا غیر حاضر داخلے قبول کرنے کے لالچ سے باز رہیں۔ انہوں نے کہا کہ معائنہ کے دوران پائی جانے والی بے ضابطگیوں کے حوالے سے مستقبل میں بھی سرپرائز انسپکشن کا سلسلہ جاری رہے گا۔
دہلی کے ان سکولوں پر عذاب نازل ہوا۔
کھیمو دیوی پبلک اسکول، وویکانند اسکول، سنت دنیشور ماڈل اسکول، پی ڈی ماڈل سیکنڈری اسکول، سدھارتھ پبلک اسکول، راہول پبلک اسکول، بھارتی ودیا نکیتن پبلک اسکول، یو ایس ایم پبلک سیکنڈری اسکول، آر ڈی انٹرنیشنل اسکول، ہیرا لال پبلک اسکول، بی آر انٹرنیشنل اسکول، ایس جی این پبلک اسکول، ایم ڈی میموریل پبلک اسکول، ہنسراج ماڈل اسکول، کے آر ڈی انٹرنیشنل اسکول، ایم آر بھارتی ماڈل سینئر سیکنڈری اسکول۔
راجستھان کے ان اسکولوں کے خلاف کارروائی
ودیا بھارتی پبلک اسکول، شیو جیوتی کانونٹ سینئر سیکنڈری اسکول، ایل بی ایس کانوینٹ اسکول، لارڈ بدھا پبلک اسکول، پرنس ہائر سیکنڈری اسکول۔
