غازی آباد:غازی آباد پولیس نے آلٹ نیوز کے شریک بانی محمد زبیر کے خلاف مقدمہ درج کر لیا ہے۔ پیر کو غازی آباد پولیس نے زبیر کے خلاف مذہبی گروہوں کے درمیان دشمنی کو فروغ دینے کے الزام میں مقدمہ درج کیا۔ داسنا دیوی مندر کے پجاری نرسمہانند کے ایک ساتھی نے زبیر کے خلاف مقدمہ درج کرایا۔ نرسمہانند کو 29 ستمبر کو غازی آباد کے ہندی بھون میں دی گئی مبینہ نفرت انگیز تقریر پر کئی ایف آئی آر اور احتجاج کا سامنا ہے۔ رپورٹ کے مطابق اتر پردیش پولیس نے نرسمہانند کو اس کے ساتھیوں سمیت حراست میں لیا تھا۔
محمد زبیر نے کہا کہ یہ بدقسمتی کی بات ہے۔ غازی آباد پولیس نے بغیر کسی تصدیق کے ایف آئی آر درج کی ہے۔ اور بھی صحافی تھے جنہوں نے رپورٹنگ کی لیکن لگتا ہے میرے خلاف ایف آئی آر جان بوجھ کر کی گئی ہے۔ پولیس کے مطابق، زبیر کے خلاف شکایت نرسمہانند سرسوتی ٹرسٹ کی جنرل سکریٹری اڈیتا تیاگی نے دوپہر 2.19 بجے کاوی نگر پولیس اسٹیشن میں درج کرائی تھی۔
