نئی دہلی : انفورسمنٹ ڈائریکٹوریٹ (ای ڈی) نے جھارکھنڈ کے وزیر عالمگیر عالم کے پرسنل سکریٹری کے ساتھ ساتھ پرسنل سکریٹری کے گھریلو معاون کو 32 کروڑ روپے سے زیادہ کی نقد رقم برآمد کرنے کے بعد گرفتار کیا ہے۔ حکام نے بتایا کہ ای ڈی ان دونوں کو آج عدالت میں پیش کرے گی اور ریمانڈ پر لے گی۔ آج دوسرے دن بھی ای ڈی کئی لوگوں کے ٹھکانوں پر چھاپے مار رہی ہے۔ ای ڈی نے پیر کو دعویٰ کیا کہ عالمگیر عالم کے سکریٹری سے مبینہ طور پر منسلک گھریلو ملازمہ کے متعدد احاطے میں تلاشی کے دوران 35.23 کروڑ روپے کی بے حساب نقدی اور کئی سرکاری دستاویزات برآمد کیے گئے ہیں۔
سرکاری ذرائع نے بتایا کہ وزیر سے وابستہ ایک جگہ سے 32 کروڑ روپے سے زیادہ کی نقدی ضبط کی گئی ہے، جب کہ مرکزی ایجنسی نے الگ سے کچھ دیگر جگہوں پر چھاپے مار کر 3 کروڑ روپے سے زیادہ کی نقدی برآمد کی ہے۔ ای ڈی پچھلے سال سے اس معاملے کی تحقیقات کر رہی ہے اور اس نے ریاست کے دیہی ترقی کے محکمہ کے ایک سابق چیف انجینئر کو گرفتار کیا ہے۔
ذرائع کی طرف سے شیئر کی گئی ویڈیوز اور تصاویر میں ایجنسی کے اہلکار یہاں گدھی خانہ چوک پر واقع فلیٹ میں ایک بڑے بیگ سے نوٹوں کی ڈبیاں خالی کرتے ہوئے نظر آ رہے ہیں۔ ای ڈی ذرائع کے مطابق نقدی گننے کے لیے آٹھ نوٹ گننے والی مشینیں لگائی گئی تھیں۔ ذرائع نے بتایا کہ برآمد شدہ نقدی بنیادی طور پر 500 روپے کے نوٹوں پر مشتمل تھی۔ مرکزی نیم فوجی دستوں کے اہلکاروں کو عمارت کی حفاظت کرتے ہوئے دیکھا گیا جہاں یہ فلیٹ واقع ہے۔
ذرائع نے بتایا کہ جھارکھنڈ کے دیہی ترقی کے وزیر عالم کے پرسنل سکریٹری سنجیو لال کا ایک گھریلو ملازم مبینہ طور پر اس جگہ رہتا ہے جہاں سے نقد رقم برآمد ہوئی تھی۔ انہوں نے کہا کہ جس جگہ سے نقدی ملی تھی اس کی چابیاں لال کے فلیٹ سے ضبط کر لی گئی ہیں۔ ذرائع نے بتایا کہ ای ڈی کی طرف سے ریاست کے چیف سکریٹری کو لکھا گیا ایک سرکاری دستاویز اور سفارشی ٹرانسفر اور پوسٹنگ لیٹر بھی احاطے میں تلاشی کے دوران ملے ہیں۔
یہ چھاپہ رورل ورکس ڈپارٹمنٹ کے سابق چیف انجینئر وریندر کمار رام کے خلاف منی لانڈرنگ کیس سے متعلق ہے، جنہیں ای ڈی نے گزشتہ سال گرفتار کیا تھا۔ گزشتہ سال جاری کردہ ایک بیان میں، ایجنسی نے الزام لگایا تھاکہ رورل ورکس ڈپارٹمنٹ، رانچی میں چیف انجینئر کے طور پر تعینات وریندر کمار رام نے ٹھیکیداروں کو ٹینڈر الاٹ کرنے کے بدلے رشوت کے نام پر غیر قانونی آمدنی حاصل کی تھی۔ ایجنسی نے افسر کے 39 کروڑ روپے کے اثاثے ضبط کر لیے تھے۔ بیان میں کہا گیا ہے، اس طرح، جرم سے حاصل ہونے والی آمدنی کو وریندر کمار رام اور ان کے خاندان کے افراد نے ایک ‘پرتعیش طرز زندگی گزارنے کے لیے استعمال کیا۔ وریندر کے خلاف منی لانڈرنگ کا معاملہ جھارکھنڈ اینٹی کرپشن بیوروکی شکایت سے متعلق ہے۔
