پٹنہ: بہار میں نتیش کمار کی قیادت والی این ڈی اے حکومت نے اسمبلی میں اپنی اکثریت ثابت کر دی ہے۔اسمبلی میں نتیش کمار کی حکومت کے حق میں 129 ووٹ ڈالے گئے۔ آر جے ڈی لیڈر تیجسوی یادو نے کہا کہ انہوں نے بہار کے وزیر اعلیٰ نتیش کمار کو ہمیشہ باپ کی طرح سمجھا ہے اور وہ نہیں جانتے کہ انہیں’گرینڈ الائنس‘ چھوڑ کر این ڈی اے میں واپس آنے پر کیوں مجبور کیا گیا۔
اعتماد کے ووٹ پر بحث کے دوران تیجسوی نے ریکارڈ نویں بار اور پانچ سال کی میعاد میں تیسری بار وزیر اعلیٰ کے حلف لینے پر بھی طنز کیا اور کہا کہ ایسی مثال پہلے کبھی نہیں دیکھی گئی۔ سابق نائب وزیر اعلیٰ نے کہا کہ میں نے ہمیشہ نتیش کمار کو ’دسرتھ‘ کی طرح سمجھا۔ مجھے نہیں معلوم کہ وہ عظیم اتحاد کو دھوکہ دینے پر کیوں مجبور ہوئے۔ انہوں نے کہا کہ بی جے پی بہار میں ’گرینڈ الائنس‘ حکومت سے خوفزدہ تھی۔
